يعني إيه معنى الوطن

لمّا يضيع معنى الوطن

فيه ناس تعيش من غير شجن
وناس تعيش معنى المحن
وناس تكون ليها الحياة
ولا تتنسيش
وناس يادوب تتمنى بس
تحلم تعيش
واحنا ما بين الناس نفوت
لفينا نسأل عل البيوت
فين نلاقينّا سكن
لما يضيع معنى الوطن
××××
لما يكون الحلم حضنه
شوكه يغرسها الصديق
لما أماني العمر تبقى
حرف في دفتر غريق
لما دفا الأوطان يدور
حضن غيرك ياصديق
يبقى فين نلقى سكن
لما يضيع حضن الوطن
××××
لما يكون حضنك يابلدي
زنزانه جدرنها الصدور
لما نلاقي الخوف ملينا
والأماني حسّها جوّ القبور
لما ليلي يبقى بكره
أمتى يسكن حلمي نور
أمتى نصرخ فالعلن
واحنا يحاصرنا بالوطن
××××
لما يضيع معنى الوطن
فيه إيه هيفضل فالوجود
حتى الأماني الممكنة
تبقى سراب ملها حدود
تبقى الحقيقة المؤلمة
إني حياتنا فالشرود
أصلي الوطن ماهو سكن
ولا كلمة حلوة يعزفها عود
ما هو الوطن هو الوطن
زي الأمومة في المحن
يعني معاني دا الوطن
إحساس بداخلنا يكون