الخطوة مرجيحه قلق

الخطوة مرجيحة قلق

الليل
شوية أسئله متكسره
ف نهار بيتعري من كل الذنوب
أيوب صبر ع الزمن
والصبر كان زاده
زاده اللى فاضل لعمرنا ميكفيناش
الخطوة مرجيحة قلق
والسكة مشوار الغريب
من فين يودي ويروح لفين
وانا وانت قاسمين القمر نصين
ومغمسينه بالعرق
لحظة شرق صاحبي
صبيت له النيل ف كبايه
ف بدأنا الغنا
معدتش بينا الملهمه
اللى تنادي للولد
فعشانها يبدء ملحمه
وبهيه سابت توب يس بالدم متحنى
ويس سايبنا ف الحكاية
من غير حقيقة للرجوع
جالدنا ايده اتخدلت م الضرب فينا
ماسك بأيده توب يس
يمسح صراخنا عن ايده
وتوب يس يعرق بكي
الدايه مستنيه علامات البشارة
كات الامارة
واحد هيخرج مننا
ناصر ماكنش ف يوم نبي
ولا جاله وحي من السما
ناصر يا دوب كان م البشر
حاسس وعايش جرحنا
وعشان كده
تسند كتافه يدنا
( دي الفاس اللى ف يد جمال
تحرص قبر صلاح الدين )
ناصر حزين
لما انكسر من بين ايديه وش الفرح
صوت المغنى إنجرح
مبقاش بيقبل دندنه
مبقاش بيعزف ف وشنا
الا شوية أسئله
والليل بيعزف سينفونيات التعجب
وعلامه استفهام
طلع القمر
واحنا بنكنس من شوارعنا النهار
علشان عذابنا يخشنا
يسمع حكايات للربابه وينتشي
وينام ويحلم
يبقي واحد مننا
لكنه مبيعرفش
غير انه يبقي
وش يشبه حزننا