أغنية لميدان التحرير
=========
ياللا حالاً بالاً بالاً
نُطْـرُد حسني مْبارك
الطيارة يا افندم واقفة
واقفة في انتظارَك
حيث جنابك جبت لشعبك
قُرحة كمان ومرارة،
والتعذيب والنهب يا ريِّس
ناجح فيه بجـدارة
قوم واتفضل لحلح طولك
خُد ويَّاك سي جمال
وعلاء وامُّه وكل معارفك
ورموز الاحتيال
لو تقلان م التُّخمة يا ريس
خليك واحنا نشيلك
يوم السعد يا ريس لَمَّا
ترحل إنتَ وجيلك
هيلا بيلا يا مصري يا اخويا
ياللا وهـات نقالة
لاجل نرُوح للريس فوراً
ونغيَّـر دي الحالة
لولا حرام واللهِ بيشهد
كنـا نولَّع فيـك
إنتَ وسوسو وجوجو وعوعو
وعِزّ وكل ما ليك
ياللي طفحتوا الكوتة معايا
غنـوا وقولوا آمين
ملعون اللي يخون الشعب
ما تقولوا يا مصريين
يسقط يسقط حسني مبارك
ربي يلخبط كل احوالك
بكرة الشعب يحاكمك حتمًا
إنت وسوزي كمان وعيالك
ياللا حالاً بالاً بالاً
نمشي لحد القصر
نُطرُد أُس فساد الدولة
لاجل نحرر مصر
هي مسيرة صَغِيرَة كَبِيرَة
ماشية بكل الشعب
نهتف لازم لازم يرحل
اِهتِف كده مِ القلب
حكم العسكر لازم يرحل
لازم يرحل فـورًا
والحرية ترفرف عالي
عالي وعالي ودومًا
حكم العسكر لازم يرحل
يرحل يرحل عنَّـا
والحرية ترفرف عالي
وتنوَّر في بلـدنا
إحنا لَدَيْنا مطلب واحد
واحد واحد بس
يسقط كل نظام الريس
أصل ده وش النحس
مش ماشيين كده قبل ماتمشي
دا احنا طردنا الخوف
دم الشهدا دا لسه بينزف
والقاتل معـروف.
اصمُد اصمُد يابن بلدنا
احنا شباب وِشْياب
اصبُر ثانية بعد مبارك
هيزول ألف حجاب
مهما يقولوا ومهما يخونوا
اسمع كلمة حق
اللي بيرعب حاكم خاين
هو كلمة لأ.
راح تكتب في العزة قصايد
وتحرر م القهر
شعب وأمة، وبعد الضلمة
لازمًا يطلع فجر.
ياللا يا مصري نقوم نسقيها
أرواحنا وِعَرَقْنـا
لاجل الورد يفتَّح فيها
ونرجَّع أمجـادنـا
ياللا حالاً بالاً بالاً
نُطْـرُد كلِّ مْبـارك
المحاكمة يا افندم جاهزة
جاهزة وفي انتظارك.
